Mae’r dyddiadau pan allech chi adael eich drws ffrynt heb ei gloi heb ofn y byddai dim yn mynd ar goll wedi mynd yn anffodus.
Yn ffodus, mae’r mwyafrif o bobl yn onest; serch hynny, mae’n well peidio â chymryd unrhyw siawnsiau gyda diogelwch eich cartref, yn arbennig os ydych chi’n byw ar eich pen eich hun ac yn hŷn neu’n anabl.
Cymerwch gamau syml i’ch cadw chi a’ch eiddo’n ddiogel drwy’r amser:
- cloi'ch eiddo pan fyddwch chi’n mynd allan – hyd yn oed os ydych chi ond yn pigo drws nesaf
- cau pob ffenestr pan fyddwch chi’n mynd allan
- peidio â gadael allweddi yn hongian o fewn cyrraedd i ddrws neu ffenestr
- os byddwch chi ffwrdd dros nos, defnyddio amseryddion ar oleuadau a gofyn i gymdogion galw heibio o bryd i’w gilydd. Gadael car ar y dreif os oes modd
- peidio byth â hysbysebu’r ffaith eich bod chi wedi prynu eitemau drud, e.e. gliniadur neu deledu, drwy adael y pecynnau tu allan
- ychwanegu ‘twll sbïo’ at eich drws ffrynt er mwyn i chi gael gweld pwy sydd yno cyn i chi agor y drws
- ystyried camau diogelwch ychwanegol fel cloeon ar ffenestri neu larwm byrgler
Mae Crime Prevention (Saesneg yn unig) yn cyhoeddi llawer o gyngor defnyddiol am sut i gadw’ch cartref yn ddiogel, gan gynnwys awgrymu trefn amser gwely (Saesneg yn unig) a rhestr gyfeirio (Saesneg yn unig) ddefnyddiol cyn mynd ar wyliau.
Keysafe
Blwch metel diogel y tu allan i’ch eiddo yw Keysafe lle gallwch chi gadw allwedd sbâr. Dim ond rhywun sy’n gwybod y cod cyfrinachol all agor y blwch. Mae Keysafe yn golygu mewn argyfwng y gall parafeddygon neu weithwyr argyfwng eraill gael gwybod y cod cyfrinachol a chael mynd i mewn heb achosi difrod i’r eiddo.
Byrgleriaeth drwy dynnu sylw
Mae byrgleriaeth drwy dynnu sylw yn fath arbennig o gas o drosedd achos yn aml mae’n cynnwys rhywun yn gofyn am help ac yn cymryd mantais o’ch natur dda.
Y syniad yw chwarae cast fel eich bod yn eu gadael i mewn i’ch cartref, efallai drwy ofyn am wydraid o ddŵr neu i gael defnyddio’ch ffôn; a phan fyddwch wedi troi’ch cefn, byddant yn chwilio am arian neu bethau gwerthfawr.
Bydd rhai troseddwyr efallai’n cymryd arnynt eu bod yn weithwyr swyddogol e.e. o’r bwrdd dŵr, ac mae eraill yn anfon plentyn at eich drws i ofyn am help, ac wedyn yn ei ddilyn i mewn i’ch cartref heb i chi sylwi.
Defnyddiwch y Cynllun Tri Cham i aros yn ddiogel.
Cam 1: os oes gennych chi amheuaeth, cadwch nhw allan (eich cartref chi yw ef).
Cam 2: cynlluniwch beth i’w ddweud ymlaen llaw a chadwch restr o gysylltiadau wrth law er mwyn i chi gael gwirio cerdyn cyflwyno galwyr annisgwyl.
Cam 3: os ydych chi’n drwgdybio, ffoniwch gymydog neu’r heddlu ar 101 (os ydych chi newydd gael eich bwrglera, ffoniwch 999).