skip to main content

Mae prentisiaethau yn cynnig cyfle i bobl ifanc ddechrau gweithio ac ennill cymwysterau a sgiliau ar yr un pryd.

Mae prentis yn gwneud swydd go iawn i gyflogwr go iawn. Mae’n astudio am gymwysterau proffesiynol cydnabyddedig, ar yr un pryd â dysgu sgiliau hanfodol sy’n gysylltiedig â swydd benodol oddi wrth gydweithwyr profiadol.

Mae tri math o brentisiaeth, sy’n cymryd rhwng blwyddyn a phum mlynedd i’w cwblhau yn dibynnu ar y lefel, y diwydiant ac ar sgiliau presennol y prentis.

Mae unrhyw un sydd dros 16 oed, yn byw yng Nghymru ac nad yw mewn addysg llawn-amser yn gallu gwneud cais am brentisiaeth. Mae’r gystadleuaeth yn gryf felly mae’n rhaid i’r person ifanc ddangos ei benderfyniad i wneud cynnydd drwy’r brentisiaeth.

Manteision prentisiaeth

Mae prentisiaeth yn cynnig llawer o fanteision, sy’n cynnwys:

  • cael eich talu o’r diwrnod cyntaf
  • hyfforddiant ymarferol a damcaniaethol o’r cychwyn cyntaf
  • cael eich talu i fynychu’r coleg
  • cymorth i wella rhifedd, llythrennedd a sgiliau TGCh os oes ei angen
  • ennill cymhwyster seiliedig ar waith (o leiaf Lefel 2 o Fframwaith Credydau a Chymwysterau Cymru)
  • y posibilrwydd o astudio hyd lefel gradd a’r tu hwnt, e.e. ym meysydd peiriannu, adeiladu, gweinyddiaeth busnes
  • datblygu sgiliau ‘trosglwyddadwy’ fel gwaith tîm, blaengarwch a rheoli amser
  • defnyddio technolegau a dulliau cyfredol.

Mathau o brentisiaeth

Mae tri math o brentisiaeth am fod gwahanol swyddi yn gofyn am lefelau gwahanol o gymwysterau, rhai’n uwch na’i gilydd.

  • Prentisiaeth Sylfaen – gweithio tuag at NVQ Lefel 2
  • Prentisiaeth – gweithio tuag at NVQ Lefel 3
  • Prentisiaeth Uwch – gweithio tuag at NVQ Lefel 4 neu radd

Mae gan bob lefel prentisiaeth ofynion mynediad gwahanol.

Mae yna brentisiaethau sy’n amrywio o adeiladu i drin gwallt, gofal plant i weinyddiaeth busnes, gwasanaeth cwsmeriaid i ddylunio graffig, garddwriaeth a pheiriannu. Mae’r Fyddin yn cynnig rhaglen brentisiaethau (Saesneg yn unig) i recriwtiaid newydd.

Mae gan Gyrfa Cymru gronfa ddata paru prentisiaethau er mwyn i chi gael gweld beth sydd ar gael yn eich ardal chi.

Oriau a thâl

Dylai prentisiaid weithio am o leiaf 30 awr y wythnos a dim mwy na 40, gan gynnwys yr amser sy’n cael ei dreulio yn y coleg neu mewn hyfforddiant oddi ar y swydd.

Mae pob prentis yn derbyn cyflog, ond mae’r swm yn dibynnu ar ei oedran, y math o brentisiaeth ac am faint mae’r prentis wedi bod yn hyfforddi.

Mae o wybodaeth am dâl ac amodau prentisiaid yma (Saesneg yn unig).

Mwy o wybodaeth

Am fwy o wybodaeth am brentisiaid cysylltwch â Gyrfa Cymru.

Diweddariad diwethaf: 21/05/2018